गुरुवार, 12 जनवरी 2012

कहाणी


कहाणी

खड़को

जगमग बजार । च्यारुंमेर च्यानणौ । भारी भीड़ । गाड़ी-घोड़ा मावै ई कोनी ।
दियाळी रै मौकै लोग नूंवी जिनसां बपरावण सारु बजार में उमड़ जावै ।
भांत-भंतीली दुकानां सजायोड़ी । कठै ई मिठाई, कठैई पटाखा, कठैई कपड़ा-लत्ता
तौ कठैई रमतिया । गिराकां नै बुलावण सारु लोडस्पीकर न्यारा बाजै । मतळब बजार में रुणक ई रुणक । पटाखां री दुकान माथै मेळौ मंड्योड़ौ । पटाखा ई हजार भांत रा । टिकड़ी,
फुलझड़ी, सूतळी बंब, घूम चकरी, रंग-बिरंगी अनार, गंगा-जमना, सीटी , लाल
लड़ी, हथगोळा , तीर अर नीं जाणै कांई-कांई । नांव चेतै राखणा ई मुस्कल ।
गिराक आवै अर देखतां-ई-देखतां झोळौ भर ’र ले जावै ।
"बिल कित्ता रौ ?"
"सात सौ रीपिया ।"
"म्हारा?"
"आपरा हजार हुग्या सा !.... बेसी क्यांरा है ? जी खुस हुय जावैला ।
पटाखा रा धमीड़ बाजसी तौ पाड़ौसी मूंड़ौ लुकौ’र सो जासी । बास आळा बात करैला
!... ऐक ई पटाखौ फुस्स हुयजै तौ पूठा ल्या’र न्हाख दिया ! ठेठ शिवकाशी
सूं माल मंगायौ है । चीज रा दाम लागै । साल में ऐकर आवै दियाळी । टाबर रौ
जी करग्यौ , काठ ना करौ ...."
दुकान रै ऐन साम्ही ऊभौ गणपत पटखां कानी ललचाई निजरां सूं तकावै । दस
रीपिया रौ ऐक नोट उणरी जीवणी मुट्ठी में भेळो करयौड़ौ ।बौ मनोमन पटाखा
छांटै-लड़ी........ नीं चक्करी....... तीर ठीक रैसी...... गंगा जमना रौ
धमीड़ तकड़ौ हुवै !
पण अंटी में फसत दस रीपिया । बेसी लावै ई कठै सूं? आ तौ भली हुई के काल
नरेगा रौ हफ्तौ मिलग्यौ अर मा उणरी रीगळ्यां सुण’र टूठगी, नींतर मोठ री
छिंया बैठ्यौ रैवौ भलां ई ! मा नै ई के औळमौ? बा कठै सूं ल्या देवै हुंडी
? ऐकली लुगाई सारु पांच जीवां री गुवाड़ी धिकाणी कोनी । इण मूंघीवाड़ै में
बड़ा-बड़ा रा डेरुं बाजै । किंया थाकौ धिकावै, आ तौ बा ई जाणै !
गणपत चेतै करै जद उणरा बापू दियाळी पर घरै बावड़ता तो ऐक झोळौ पटाखा
ल्यावता । पण अबै बापू ई कोनी रैया तो कुण ल्यावै पटाखा ! बापू कैवता -
"थूं तो पटाखा छोड़े, म्हैं तौ सांचला गोळां ने छूटता देखूं !"
ऐक दिन बै खुद बंब री सीध में आग्या । महाजन फ़ील्ड फ़ायरिंग रेंज में
स्क्रेप चुगतां ऐक जीवतों बंब बां री जिनगाणी खाग्यौ । गणपत री आंख्यां
बैवण लागगी । सात बरस बीतग्या । अबै बौ चवदै बरस रो हुग्यो । लारले सात
बरसां मे मा कदी दिवाळी कोनी मनायी । मनावै ई कीकर ? उणरै जीवण में तौ
अंधारौ ई अंधारौ है ।
घर में तो दियाळी कोनी धोकीजै, पण बीजे घरां में पटाखां रौ रोळौ सुण’र
टाबरां रौ जी करै । ईण बात नै समझतां ई मा आज गणपत नै पटाखां सारूं दस
रीपिया दिया है । बौ आधी घंटा तांई पटाखां कानी पसवाड़ै खड्यां तकावतौ
रैयौ अर छेकड़ हिम्मत कर’र नैड़ै पूग्यो ।
"ओ सूतळी बंब कित्ता रो है?"
"तीस रीपीया रौ, कित्ता देवूं?"
"तीस रौ है, पण म्हारै खनै तौ फ़गत दस रीपिया है ।"
"दस रौ तौ टिकडया रौ डब्बो आसी ।"
"तौ अनार दे दयो !"
"चार अनारां रौ डब्बौ पच्चीस रो है । खुली कोनी बेचां ।"
"एक काढ देवौ नी !"
"कह दियो नीं खुल्ली कोनी बेचां । अबै मगज मत खा । आगै चाल ।"
दुकान पर गिराकां रौ जमघट लाग्यौड़ौ । इण भीड़ बिचाळै दस रीपिया री पूंजी
रै धणी नै कठै ठौड़ ? दुकानदार बांवड़ौ झाल’र बीं नै आगीनै धक्को दियो ।
"धंधा रौ टैम है । खोटी ना कर ! रास्तौ नाप थारौ...."
गणपत अण्मनौ सो आगै चाल पड़्यो, पण निजरां अजै ई पटाखां माथै टिक्योड़ी ।
बीं री आख्यां सीली हुयगी । थकां पीसा दुकानदार पटाखां सारू नटग्यो । बौ
मनोमन अळोच करे- दस रीपिया ई किती मुस्कल सूं कबाड़्या है । मा तौ पांच
माथै ई अड़्गी । किता नौरा काढणा पड़्या । हजार खठै सूं लावूं?
बिना पटाखां घरै ई कीकर जावै ? गळी में पटाखां रा धमाधम बाजता हुसी ।
पटवारी जी रै घर रै आगे मगरियौ मंड्योड़ौ हुसी । मूळियौ, भंवरियौ, सरबती
आद हाथ में फ़ुलझड़यां लैर’र नाचता हुसी ।
फ़ुलझड़्या रो ध्यान आवतां ई बि’रै मुंढै मूळक सांचारी, पण अगले ई छिण
भळे उदासी बापरगी । बण सिसकारौ नाख्यो । मा बतावै, बां रौ बाप तो
पटवारी है । बो खुदो खुद सूं बंतळ करै- ओ पटवारी कियां बणीजै? काईं मा
पटवारी बण सके? फेर तो मौज बणजै । मोकळा पटाखां छोड़ूं । रोज नूवां गाबा
ल्यावूं । मूळिये जिसी साईकल ई मंगावू ।
बो खुद सूं सुवाल करे- मा क्यूं कोनी बणै पटवारी?
पण उथळौ कुण देवे?
बाज़ार में भीड़ बिचालै बो साव अकेलौ । बेमतळब चाल्यां जावे । साम्हीं
चौराहो आग्यो । बीं रा पग थमग्या । आगे किनै जावणो है? चौराहे सूं
च्यारूं दिस मारग फंटै, पण बीं सारू एक ई मारग कोनी ।
चौराहे रै सूवें बिचालै नेहरू जी री मूरती । धौळै संगमरमर सूं बण्योड़ी
मूंढै बोलती मूरती । नेहरू जी रो मूळकतो उणियारौ । मूरती रै च्यारूं मैर
गोळाई में दूब लाग्योड़ी । दिन मे अठै लोगड़ा बैठया रैवै, पण अबार ऐन सूनेड़।
गणपत मूरती ने ओळखै । देस रा पेलड़ा प्रधानमंत्री चाचा नेहरू । पांचवी री
पोथी में नेहरू जी री फोटू ही ।
सर जी कैवता- "नेहरू जी टाबरां रौ भोत लाड़ राखता । स्कूल छूटी तो पोथी
पानड़ा ई छूटग्या । अबै तो जेठिये रै ढाबे माथे ऐंठा ठीकर धोय’र बगत
टिपाणो है । जद बो मोढै बस्तो टांग्यां टाबरां ने पोसाळ जावता देखै तो उण
रौ ई डाढौ जी करै । बो ई चमड़े रा काळा जूता पेर’र अर गळे में टाई बांध’र
स्कूल जावणौ चावै, पण......। ओ ’पण’ उण रौ सबसूं मोटो दुसमी है । हरेक
ठोड बीं रै सपनां नै चकनाचूर कर न्हाखै ।
बीं नै रीस आ जावै । बो चाचा नेहरू री मूरती कानी तकावै । मनोमन सुवाल
पूछे- कांई बे अबे ई उणनै लाड करै? काईं बे उणने बो’ळा सारा पटाखा दिरा
सकै ?"
चाणचकै पटाखां री लांबी धमाधम सूं उणरौ ध्यान टूटै । स्यात कोई हजार
पटाखां री बाल्टी रै तूळी लगाई हुवैला । बो गूंजे में हाथ घाले । दस
रीपीया रौ मुड़्यो-तुड़्यो नोट अर एक दियासलाई री डब्बी । बो नोट हताळी पर
सीधौ करै । नोट रै जीवणै पासे चस्मो लगायेड़ा मूळ्कता गांधी बापू । वौ
गांधी जी नै ई ओळखै । सर जी केवता -"गांधी जी ई देस ने आजाद करवायो" ।
वौ खुद री आजादी रै बाबत सोचै । बीं नै आपरी मजबूरी पर झाळ आ जावै। बो
नोट ने भेळौ कर’र पूठो गूंजै मे घाल लैवै । फेर बो डब्बी बारै काढै अर एक
तूळी बेमतळब जगा’र हेठै फेंक दैवै अर कई ताळ तांई बि ने तकावतो रैवै ।
चाणचकै बो उभौ हुयो अर नेहरू जी री मूरती ने दिख्यां बिना पुठौ बाजार
कानी चाल पड़्यो । खाथौ-खाथौ । गढ सूं डावड़ै मुड़तां ई पटाखां री दुकान ।
अबै बठै भीड़ कोनी, फगत २-३ जणा पटाखां रा मौल भाव करे हा । घणखरा लोग
पटाखा लेग्या अर अबे घरे धमाधम करणै री बेळा ही । सेठ दुकान रै मायनै
हिसाब-किताब में लाग्योड़ो अर सेल्समेन पटाखा बेचण मे मगन ।
गणपत दुकान सूं बीसेक फूट दूर ऐकर ठमयो अर पछै उंतावळा पगां सूं नेड़ै गयो
। बण कणां गूंजे सूं दियासलाई री डिब्बी काढी अर कणां तूळी बाळ’र पटाखां
माथै फेंकी, कीं ठा कौनी पड़्यो । पण जद पटाखां री भड़ाभड़ गिगनारां गूंजण
ढूकी तद सगळां रे काळजै खड़कौ हुयो । गणपत मुठ्ठी में थूक’र भाज छूट्यो ।
बां पटाखां री धमाधम कई ताळ चाली अर गांव-गुवाड़ सुणीजी।

मदन गोपाल लढ़ा

0 टिप्पणियाँ: